Ориоль Ромеу англиялық клубқа ауысады

«Барселонаның» бұрынғы тұтқауылы Ориоль Ромеу «Саутгемптонге» оралады

Фабрицио Романоның мәліметінше, 34 жастағы жартылай қорғаушы Англияның клубына еркін агент ретінде ауысады. Қос тарап маусым соңына дейін жарамды келісімшартқа қол қояды. Сондай-ақ тағы бір жылға ұзарту мүмкіндігі қарастырылады екен.

Ромеу бүгін не ертең медициналық тексерістен өтеді. Содан кейін трансфер ресми хабарланатын болады.

Ориоль Ромеу бұған дейін «Саутгемптонде» 2015-2022 жылдары ойнаған еді. Осы аралықта 256 матчта сегіз гол соғып, жеті нәтижелі пас берді.

Айта кетейік, 13 турдан кейін небәрі 12 ұпай жинаған «әулиелер» чемпионшипте 21-орында келеді.